أن رحت عني جعل دربكك تساهيل ..

[فوضى الحواس]

وانا ليا تغربت ../ من غير تأويل
ارضي طموحي ( وافهمي يا فهيمه )

انا ادري انه غرك ( القال والقيل )
وكثرت عليك ../ علوم راع النميمه

لكن ترى ماعاد لي ( للصبر حيل )
ولا عدت اطيق ../ المهزله والظليمه

صحيح اجابه ( صدمة الوقت وآشيل )
و الصبر مفتاح ../ الفرج والغنيمه

واحاول ادور ( للأعذار تعليل .. )
واقول ما ينسى ../ نديمي نديمه ..!

لك بين ريضان ../ الحنايا مداهيل
ولك بالحشى ( حشمه وشيمه وقيمه )

خوذي كلام اللي ../ ليا قال ما يميل
وخلي كلام اهل ( العقول السقيمه )

( يا وردةٍ ) مالت على ضفة النيل
يهبها ريح ../ العبير ونسيمه

انا احتدم لك وانثني ../ واسرج الخيل
واعن لك واكرب لك ( شداد ريمه )

( ثلثين ليل ) وثلث باقي من الليل
بعد القطيف ../ وقبل مفرق رحيمه

( ترسل وانا مانيب يم المراسيل
الوضع سيء .. والنوايا مقيمه )

رسايلك توحي ( بقطع المواصيل )
الله يبيح اللي ../ رعاك ويديمه

ماهو كذا ( تقفي وذودي مباهيل )
وتهل دمعك ../ مثل دمع اليتيمه

( جرحتني توك وانا جرحي محيل
وهزمتني وانا ماعرف الهزيمه )

فهمتني والا ../ تبي ندبل الكيل
نصيحتي خل ( العلاقه حميمه )

لا تحسبٍ ( دمعي يبل المناديل )
لا والذي ../ منعم عليك بنعيمه

( إن رحت عني جعل دربك تساهيل
وإن جيتني غالي .. وقدر وحشيمه )